அடிமை கனவுகள்

ஒரு பிஞ்சுக் கை பற்றியிருக்கும்
பிளாஸ்டிக் உடையணிந்த துருபிடித்தக் கம்பியின்
மறுமுனை வளைவில் பூத்திருந்த ஒரு துளையை
அதுவரையில் திரையிட்டிருந்த சோப்பு நுரை

இன்னும் கள்ளம் மொழிந்திடாத நாவின்
எச்சில் ஈரம் தொட்டு வீசிடும்
சில்லிட்ட சுவாசக் காற்று
ஜவ்வுபோல இழுத்ததில் பிய்ந்து

சிறகுகள் முளைத்த
பல கண்ணாடிப் பறவைகளாகி
ஒரு வெட்டவெளியில்
சுதந்திர ஊர்வலம் புறப்படுகையில்

ஒரு அடிமையின் கனவு
ஒவ்வொருமுறையும் கலைக்கப்படுகிறது.